http://kouttab-al-internet-almaghariba.page.tl/
  نهاد بنعكيدة
 
نهاد بنعكيدة

زجالـة
من مواليد 1974 بالخميسات
اصدرت في 1998 ديوان زجلي (علاش حرشتي لحزن ؟)
أصدرت سنة 2003 أول شريط صوتي للزجل المغربي بعنوان : ها وجهي ها وجهك
أسست موقع إلكتروني للزجل المغربي.
أصدرت سنة 2007 أول أنطولوجيا للزجل المغربي مجمع الكلام في جزئها الأول
معدة ومقدمة البرنامج الإذاعي الثقافي مجمع الكلام بإذاعة كازا ف/م
مخرجة البرنامج التلفزيوني أجي تشوف بالقناة الأولى ،
شاركت في عدة ملتقيات وفعاليات شعرية بالمغرب وخارجه ،
لها قيد الطبع ديوان زجلي : حجاب لخاطر والجزء الثاني من أنطولوجيا الزجل المغربي مجمع الكلام
القصيدة
 
إخس غامة أمدغيس
 
وقفت لمناول بين اكتافي
وطليت من شرجم ليلي
نسرق الشوفه
فـ خيالك وهو دايز
شهوتي نشوفك
ونرمي الركمه بلون حروفك
حمراني هاذ الليل
والشوفه فيه مقطعه
طراف طراف
ماعندي عليك هروب
غير نطيح عيني ف لبياض
نتوسد ركبة الورقه
يتيمه أنا فأرض حروفك
مقطوعه من بياضك
وجدري لمجدر
مسقي بلحرقه
فكريني يا ورقتي
علاش انا فيك ؟؟؟؟
انتي دماغي
رديني لمجاجي
نتمرغ ف رملي الحامي
نتعلق بجذور نخلتي لمجرده
نتلثم بزروقيه السما
نركب حلمي العالي
نشد الطريـق
لقبيلة أمادغيس
قالت مولات الفال :
إخس غامه
من ألف عام
وها انت ساكن فمنامتي
قاطع الطريق على ليلاتي
مكمش فـ يديك نهاراتي
وخا حاميه شمسي
وخا قهرت فـ لفليافي
شحال من قيسي
ها أنت مسلطن
سلطان ايامي
تاج مجاجي
هازم بجيوش غرامك
ريح يأسي
وتراب اعجاجي
إخس غامة
و كيف الوصول ليك ؟؟؟؟
وانا ريحي مكسورة لجناح
وسوالفي مجدافها قصيره
وطريق القلب طويلـه
طـويله
أنت الطريق
وشحال كليت فيك من خطوه
ولا وصلت ليك
أنت التيه
وشحال من نجمه
طمعتني بخيط شعاها
ولا لاحتني فيك
أمادغيس
اتقطع بيا لحبل فـ فيافيك
وزطاط قلبي
يسال ويسول
قوافل شاده الرحال
ولا عطاتني الطوع
ولا النعت عليك
أمادغيس
لا تغودا محال توصل ليـك
أمادغيس
حوريه .............نتكب فـ وادك
جنيه...................نتسيف ف نارك
ف دار ف خيمتك
وتادك
فجوادك
نحرق قلبك
وكل ليلى قطرتها شموعك
على ورق اشعارك
أمادغيس
اسمعني بجوارحك
اقراني تيفيناغ فحيط جراحك
شمني ورده سمره
لون بيها افراحك
وإيلا مشى ريحي مع رياحك الربعه
حكيني حكايه
للقمره والشمعه
أمادغيس
انت شبيهي .....ف فرحي
شبيهي .......ف جرحي
شبيهي........... ف قرحي
انت شبيهي .....فـ مكتوبي المطروز على لوحي
انت ................... انا
انا ..........انت
امادغيس
أنت الطير الحر
وأنا سماك
طير فيا اطلع لبرج العشاق
وعطيها للتبراح
صلاتك ف مقامي واجبه
ادخل ديري.....وديني
أنا فمحراب هواك راهبه
اطلق بخور محاينك
وتجلى.... شيخ .....فـ بهاك
وفوق جلدي سيـح
شتت أجر هواك
على بساطي
وحبات التسبيح
أمادغيس طابت لجراح
وغدا ملقانا
والوحدانية عطاتنا بالظهر
قول ، يمكن اطلع الزهر
بين كثبان الرمل
ثمرات نسفوها على الريق
أمادغيس
العطش
وأنت الما
حلو لعطش والما فيك
أمادغيس
الطريق
وأنت الخطوه
طريقي صاوبتها بلممشى
ليك
بين مروج الزعتر
أمادغيس
لعطش، لفيافي
وقلة الزاد
جغمة من بيرك الغارق
تغرقني وتهيجني بحر
حجرة سمرة منك
نفرق الصوم
نتوسدها ....نرتاح
من تشراج الطريق
وحمورية لقهر
شوم حنين
يسوط على جوارحي
برد وسلام م الحر
أمادغيس
شهوتي ....نقطة ما ...سمرة.......من واحة عينيك
نشربها ف كفوفك
ونزيد
أمادغيس
ملقانا غدا
فـ لخلوه نشوفك
غدا عيد
نهز كفوف شوقي
ودعايا لسماك العالية
شوقي بلا جناح
يطير ويطيح
تتحتحت منو حنتو وحروفو
إخس غامة
رمان ودالية
محنيه يديا ليك
حبق
سوسان
نعناع
مشموع بلعمان
ريش النعام
هدي مرفودتي ليك
أخس غامة
وعلاش أنا فيك ؟؟؟؟

 
 
   
 
This website was created for free with Own-Free-Website.com. Would you also like to have your own website?
Sign up for free